После 10 години успешна соработка, Јане го напушти „Фидбек Бенд“

Музичкиот состав познат по одличните настапи и големиот број приватни прослави, „Фидбек Бенд“ повеќе нема да биде ист, од него си заминува фронтменот и вокал Јане Славов.

– По десет години заедничка работа и успех, дојдовме до моментот кога одлучив да направам промена во поглед на кариерата. Промена која носи нова енергија и излегување од комфорот зона, со цел сите да продолжиме да растеме како личности и уметници. Во овие години поминавме многу заеднички моменти, учевме едни од други и создадовме трајни спомени. Без разлика на тоа што музичкиот пат сега се разделува, нашето пријателство и сеќавањата на заедничката работа остануваат како највреден плод на овие десет години, вели Јане Славов за напуштањето на досегашниот бенд.

Пејачот најавува нови авторски песни кои планира да ги објави и промовира во наредниот период:

– Во тек е подготовка на нови авторски песни кои се надевам дека ќе ги слушнете во идниот период. Во следниот период целосно ќе се посветам на музиката, со нови идеи и проекти кои верувам дека ќе донесат свежина и нова енергија во мојот музички свет, додава Славов.

Од досегашниот бенд му посакаа успеси во понатамошната кариера и најавија дека наскоро ќе ја информираат јавноста за промените во бендот.

Додека очекуваме новости, да се потсетиме како звучат заедно на едно место Јане Славов и „Фидбек Бенд“.

Дани | ТВ Пакет