Хрватската крими серија „Молк“ секоја недела на Алфа во 20 часот

„Молк“ е хрватска криминалистичка драма, инспирирана од вистински настани поврзани со сексуална експлоатација на малолетни девојчиња, трговија со луѓе и корупција меѓу влијателни политичари и бизнисмени.

Серијата има две сезони со вкупно 12 епизоди, а дејството се одвива главно во Осиек, Хрватска, и Киев, Украина. Приказната започнува кога во реката Драва, во Осиек, е пронајдено телото на млада девојка. На прв поглед изгледа како несреќен случај, но полицискиот инспектор Владимир Ковач се сомнева дека зад нејзината смрт се крие нешто многу посериозно.

Набргу умира уште една малолетна девојка, овојпат од предозирање со дрога. Иако двата случаи изгледаат неповрзани, истрагата постепено открива дека девојките биле жртви на организирана сексуална експлоатација.

Во исто време, во Киев исчезнува Катја, внуката на Олга Хорватиќ, Украинка која е мажена за Иван Хорватиќ, еден од најмоќните луѓе во Осиек.

Кога Катја е пронајдена мртва во Хрватска, станува јасно дека исчезнувањата и убиствата се дел од многу поголема криминална мрежа која ги поврзува Украина и Хрватска.

Инспекторот Владимир Ковач, неговата колешка Весна Хорак и новинарот Стрибор Краљ се обидуваат да ја откријат вистината. Меѓутоа, нивната истрага ги доведува до влијателни политичари, богати бизнисмени и луѓе кои се подготвени на сè за да ги заштитат своите тајни.

Олга постепено открива дека и нејзиниот сопруг можеби е поврзан со мрачните активности што се обидува да ги разоткрие. Како што истрагата напредува, главните ликови се соочуваат со закани, предавства и тешки морални одлуки.

Дани | ТВ Пакет