„Love Island“ доби регионална верзија – љубов, драма и 50.000 евра

Во Србија, Хрватска, Словенија, Босна и Херцеговина и Црна Гора започна новото регионално реално шоу „Love Island Adria“, локална верзија на еден од најпознатите светски reality и dating формати „Love Island“. Шоуто премиерно започна на 13 септември 2026 година, а се емитува преку стриминг-платформата VOYO, како и преку телевизиските партнери на платформата во регионот.

Дејството се одвива во луксузна вила на Тенерифе, каде група млади слободни момчиња и девојки живеат заедно пред камерите и се обидуваат да пронајдат љубов, но истовремено и да останат што подолго во играта. Учесниците формираат парови, а во текот на сезоната пристигнуваат нови натпреварувачи кои можат целосно да ги променат постојните односи. Оној што ќе остане без партнер ризикува да биде елиминиран. На крајот, најуспешниот пар се бори за главната награда од 50.000 евра.

Првите десет учесници кои влегоа во вилата се Mili (26), Drina (22), Lara (19), Loren (28), Tara (23), Anthony (22), Gašper (28), Roberto/Robi (26), Valentin и Vukašin. Тие доаѓаат од различни делови од регионот, но и од дијаспората, па така меѓу нив има учесници поврзани со Србија, Хрватска, Словенија, Босна и Херцеговина и Црна Гора, како и кандидати кои живеат во Велика Британија, Канада и Австралија.

Меѓу девојките се Mili од Смедерево, која живее во Црна Гора и се занимава со фитнес; Drina од Чачак, идна костимографка; Lara од Белград; Loren од Сиднеј со хрватски корени, која е сопственичка на креативна агенција; и Tara, Канаѓанка со потекло од Теслиќ во Босна и Херцеговина. Меѓу момчињата е и Gašper од Љубљана, поранешен професионален кошаркар и личен тренер, како и Anthony, поранешен кошаркар со британско-српско потекло.

Водителка на првата сезона е српската актерка Dragana Mićalović, додека наратор е хрватскиот пејач и водител Saša Lozar.

Посебноста на „Love Island“ е што гледачите не се само пасивни набљудувачи. Преку официјалната Love Island Adria апликација, публиката може да гласа и директно да влијае врз случувањата во вилата за тоа кој ќе остане, кој ќе си замине, а во одредени ситуации дури и кои учесници ќе формираат пар.

Новите епизоди се објавуваат од недела до петок во 20 часот, а целата сезона е планирана да трае околу осум недели. Со учесници од повеќе земји од поранешна Југославија, „Love Island Adria“ е замислен како заеднички регионален проект и локална верзија на форматот кој веќе се емитува во повеќе од 20 земји ширум светот.

Дани | ТВ Пакет