Албанската национална ТВ ги претстави сериите за оваа сезона

Албанската национална телевизија RTSH ја најавува новата телевизиска сезона со нови атрактивни странски серии, меѓу кои доминираат турските продукции, но во понудата има и европска историска драма.

„Aşkı hatırla“ (Remember love) e романтична турска серија со Ханде Ерчел и Бариш Ардуч во главните улоги, која ја следи приказната на двајца поранешни љубовници чии патишта повторно се вкрстуваат по неочекувана порака.

„Aynadaki Yabancı“ (Странецот во огледалото) e драмска приказна со Онур Туна, исполнета со семејни тајни, скриени идентитети и минато кое постепено излегува на површина.

„El Turco“ e  големата историско-авантуристичка продукција со Џан Јаман, во која турски јаничар по Виенската битка се наоѓа во италијанско село и станува предводник на локалното население во борбата против неговите угнетувачи.

„Hunyadi“ (Rise of the raven) e една од најамбициозните европски историски серии во последните години, посветена на животот и битките на Јанош Хуњади, една од најзначајните воени фигури во Европа во XV век.

„Máxima“ e европска биографска драма за животот на кралицата Максима од Холандија, од нејзините години во Аргентина и запознавањето со престолонаследникот Вилем-Александар до влегувањето во холандското кралско семејство.

Со слоганот „Нова сезона на приказни“, RTSH очигледно оваа есен се обидува да понуди разновидна сериска програма – од романса и семејна драма, преку историски спектакли, па сè до приказна инспирирана од животот на една современа европска кралица.

Дани | ТВ Пакет