Почетна / Живот / Интервју: Кој е Жаре Донински и зошто е еден од најдобрите фитнес тренери во Македонија

Интервју: Кој е Жаре Донински и зошто е еден од најдобрите фитнес тренери во Македонија

Жарко Жаре Донински е фитнес тренер кој со оваа своја активност, а денес и работа, се занимава од својата 17-та година. Низ годините своите успеси ги бележи на Куп на Македонија во 2017. година со четврто место во категорија „физик“, а следната 2018. година на истиот натпревар го освојува првото место. Со оглед на тоа дека тој се занимава и со атлетика, истата година е носител на титулата трето место како Атлета на Македонија.

Тој е вистинскиот избор доколку сакате да работите на трансформација на вашето тело затоа што верува во своите способности да биде ментор и учител на одреден карактер кој што има потреба од помош во градење на добри навики, а со тоа и фитнес цели. На неговиот профил на Инстаграм може да дознаете повеќе за услугите кои ги нуди како приватен фитнес тренер.

Жаре Донински е ангажиран и во повеќе промотивни кампањи како фотомодел, а работи како тренер на полуперсонални лични тренинзи во Фитнес Клуб Фит.

Жаре, колку време одвојуваш за вежбање?
– Тоа зависи од времето што го имам на располагање, инаку не повеќе од час и пол вклучувајќи и вежби за загревање.

Како изгледа еден твој ден?
– Моите денови се релативно исти, си имам создадено рутина. Најчесто станувам околу 9 часот прво го пијам утринското кафе и појадувам, а околу 12:30 – 13 часот одам во теретана и започнувам со вежбање се додека не започнам со работа. Во 10 часот навечер си одам дома, вечерам и поминувам време со моите најблиски, и во 1 часот по полноќ си легнувам да спијам, се до следното утро.

Дали имаш фотографии од твојата трансформација?
– Не, затоа што започнав со теретана на 15 години и немав никаква целна трансформација, туку беше рекреативно.

Дали имаш “cheat day” во текот на неделата?
– За мене лично cheat day не постои затоа што тој оброк не може да те опорави од физичка активност.

Конзумираш ли алкохол?
– Да, љубител сум на убаво вино и се воздржувам да го внесувам во умерени количини.

Како изгледаат твоите оброци? Што е важно да се има во предвид кога се внимава на тежината и каков е твојот став за суплементи?
– Во денот имам 3 главни оброци кои што претежно се состојат од млечни производи, месо, јаткасти плодови, зеленчук и овошје. Лично јас не се согласувам луѓето да даваат премногу значење на телесната тежина затоа што тоа е само една бројка. Ставот околу суплементите е дека не ги препорачувам на моите клиенти затоа што сметам дека потребната количина на одреден суплемент може да се внесе и со правилна исхрана, и дека е залудно трошење на пари.

Што вклучуваат твоите тренинзи?
– Моите тренинзи се состојат од вежби за сила, издржливост и координација. Прво пред започнување на тренинг задолжително е загревање на мускулите и зглобовите за превенција од повреди. Секој тренинг се изведува различна група на мускули, така што акцент се дава на основните вежби.

Гладување и изгладнување – како ова влијае на телото и килограмите?
– Телесната тежина поради изгладнување ќе се намали, но со тоа ќе се намали и самата енергија во телото. Затоа изгладнување не е вистинско решение за намалување на телесна тежина.

Какво е твоето мислење за фитнес сцената во нашата земја? Колку навистина Македонците внимаваат на своето тело?
– Сметам дека имаме доста добра сцена поради популаризацијата на фитнесот во светот, но за жал пандемијата ги спречува и отежнува условите за тренирање. Околу внимавањето на своето тело е попопуларно кај младите отколку кај повозрасните.

За колку време може да се забележи разлика во изгледот на телото доколку се вежба редовно и се внимава на исхраната?
– Правилното изведување на вежби и правилната исхрана се меѓусебно поврзани, кога тие две работи се усогласени резултатите би се забележале за релативно краток период.

Три основни вежби кои ги вклучуваш во секој тренинг?
– Затоа што секој тренинг се вежба различна група на мускули и вежбите се различни, но три основни вежби кои се трудам да ги направам еднаш неделно се: чучањ, мртво кревање и потисок над глава. Тоа се основни вежби коишто вклучуваат повеќе мускулни групи.

 

МОЖЕБИ ЌЕ ВЕ ИНТЕРЕСИРА

Премиера на кабаре претставата „Чикашки перверзии“ од Дејвид Мамет

Машина продакшн на ден 30ти јуни 2021 (среда) со почеток во 21.00 ч ќе ја …

error: Содржината е заштитена!