ТВ Пакет Единствен телевизиски информативен портал во Македонија
Познатиот македонски фолк пејач Борче Наумовски, кај публиката омилен како „Министерот за естрада“, одамна ја има докажано својата страст кон музиката. Со бројните хитови полни емоција и веселба, тој ја разигрува македонската публика на секој настап. Но, малкумина знаат дека надвор од сцената, Борче има уште една голема љубов – риболовот.
„Музиката ми е живот, но риболовот е мојот мир. Таму се исклучувам од секојдневниот хаос и си ги полнам батериите“, вели Наумовски, со насмевка која открива колку му значи оваа страст.
Кога не е на бина и не пее пред публика, Борче најчесто може да се најде крај езерата во Егејска Македонија. Неговите омилени точки за риболов се Леринско, Костурско и езерата околу Солун, кои се познати по своите бистри и благи води.
„Таму најлесно го наоѓам својот мир. Сме постојано изложени на гласна музика и настапи, па токму езерата ми даваат рамнотежа“, открива тој.
Иако лови и други слатководни риби – пастрмка, клен, црвеноперка – за Наумовски постои еден вистински фаворит: крапот.
„Експерт сум за крап! Ги знам сите финти, сите тајни. Секогаш е предизвик и секогаш носи радост“, вели тој. Неодамна, се врати од риболов со вистински богат улов – десетици килограми крап, со што уште еднаш ја потврди својата умешност и трпение. Патот до грчките езера, сепак, не секогаш бил лесен.
„До пред неколку години имавме проблеми на граница – Грците кога ќе ги видоа трските и мамците, веднаш не враќаа назад. Но ние бевме упорни, не се откажувавме. Со тек на време почнаа да нè пуштаат, и сега сме редовни гости“, раскажува Борче.
Најубавиот дел од целата авантура, вели Наумовски, доаѓа по завршувањето на риболовот.
„Кога ќе се собереме сите и ќе ја ставиме свежата риба на скара, тоа е вистинско уживање. Таму се раѓаат најубавите разговори, смеа и пријателства. Сите сме среќни и едвај чекаме да го вкусиме уловот“, со насмевка додава пејачот.
Иако пред микрофонот останува „министер за естрада“, пријателите шеговито велат дека на езерата е „премиер за крап“. А можеби токму таа двојна титула најдобро го опишува човекот кој знае да живее со страст – со музика на сцената и со мир крај водата.
Дани | ТВ Пакет
